[Lyric] Raoul de Cambrai (Anonyme)

" Sire Raous, tort faites et pechié
Ma mère as arce dont j'ai le quer irié -
Dex me laist vivre tant q'en soie vengiés ! "
Raous l'oï, s'a le chief enbronchié
" Fil a putain, le clama, renoié
S'or nel laissoie por Dieu et por pitié
Ja te seroient tuit li menbre tranchié !
Qi me tient ore qe ne t'ai essillié ? "
Et dist Berniers : "Ci a male amisitié !
Je t'ai servi, amé et sozhaucié
De bel service reçoif malvais loier !
Se je avoie le brun elme lacié
Je combatroie a cheval ou a pié
Vers un franc home molt bien aparillié
Q'il n'est bastars c'il n'a Dieu renoié ;
Ne vos meïsme qe voi outreqidié
Ne me ferriés por Rains l'arceveschié ! "
Oit le Raous, si a le front haucié
Il a saisi un grant tronçon d'espié
Qe veneor i avoient laissié ;
Par maltalent l'a contremont drecié -
Fiert Berneçon qant il pot aproichié
Par tel vertu le chief li a brisié
Sanglant en ot son ermine delgié
Voit le Berniers, tot a le sens changié
Par grant irour a Raoul enbracié -
Ja eüst molt son grant duel abaissié
Li chevalier i qeurent eslaissié -
Cil les departent q'il ne ce sont touchié